Tirigsikan sa Karangahan

Uy ika, iyo ika,

Magdigdi kana

Maghimate ka

Ta Tibaad makasabay ka

Sa tigsik na nobela

Madangog ika magdangog

Uya na sakong ibabalangibog

Tigsik sa kapalibutan magdadalugdog

Linigan an talinga tanganing dai mabungog

Sa giraray uni ako…

Sa hampangan nindu matigsik ki todo-todo

Tanganing ipasabot ang mga nahihiling ko…

Sa kapalibutan nagabos kita namumuro

sa pagpuon uni na ang banat ko…

Dios marhay na banggi sa saindo mga tugang
Sa satong pag-irilingan tigsik an mamimidbidan
Sarong paghurop-hurop sa sakong naobserbaran
Alagad parte kaini an pagsabot sa katotoohan

Sa sakong paglakaw-lakaw, digdi sa kinaban

Sa lugar na ini ako napaduman

Tanganing magtao nin kadiit na kaogmahan

Asin impormasyong saindong maaaraman

Karangahan Karangahan

Uya sa saimong hampangan

Alagad an sakong dakulang hapot sa kinaban

Aram daw nindu an boot sabihon

kan Karangahan na  saindong pigdudumanan

Tinigsik ko an Albay

Sa kagayunan karahay-rahay

An mga turismo tig-papaypay

Tanganing bisitahun bulkang mayon na dai na nag-aagrangay

Alagad dai lang an

Pati mga aktibidades binibisita man

Lalo na ining karangahan

Ta aram ninda ini magtatao nin dakulang kaogmahan

Alagad may mga namatean ako

Mga mahamot buda maraot na parung kunu

Kaya ini titigsikun ko

Tanganing maliwanagan kitang mga tawo

Tinigsik ko ining karangahan

Albay Green Christmas an mamatean

Makolor an kapalibutan

Asin igwang mga kaogmahan

Saro digdi an Fiesta Culinaria

Mga Pagkaun digdi masisiram talaga

Lalo na kun “free taste” an habol ta

 Hmmm Masiramun talaga

Isabay mo pa digdi an demo ni chef Quindo

Mahihiling ta sa desyembre bayte asin bayte-uno

Masisiram na putahe mananamitan niato

Alagad dai magdurusmugan ta tibaad an kutsara mabadulan kamo sa payo

Tinigsik ko man ining beer plaza

Baraylian asin konsyerto simong maeeksperyensya

Kembot digdi kanrantahan duman an drama

Kun irinuman, irinuman talaga

Magbabarkada digdi mahihiling ta

Saindang mga katropa magkakairiba

Pag-ogma saindang ibinabandera

Tanganing saindang pasko maogma-maogma

Sarong Paisi sa satong mga kahimanwa

Irinuman dai pagpasobraha

Asin iriwalan likayan ta

Ta isipinon ta an satong pamilya

Mamundu sinda kun sa pasko

May black-eye ka…

Mundu baga

Tinigsik ko an mga produkto kan mga tugan ta

Mga galing sa kabubuldan ta

Resulta nin pagiging kreitibo ninda

Sa pag-gibo nin mga bagay na hale sa kapalibutan ta

Uya baga sa gilid kan parke

produktong abaka buda pili

 ini masiram asin pwerteng-pwerte

kaya an mga turista paborito an mga ini

mundu garing ta an pili an pagsampot tituli.

Tinigsik ko man ining Christmas Tree

Halangkaw pa sa samong centree

Alagad mas magayun ini

Ta may ilaw pagkabanggi

Simbolo nin katoningonan

Simbolo nin kagayunan

Nagpapahiling man sa Bikolnung Kadunungan

Drum an saiyang lawas, pundasyon nin kakusugan

Kakusugan kan Albayanos sa pagtinarabang-tabangan

An Christmas tree ini

Orihinal asin satuya gibo ini

Dai ka lang magkamali na iruun ini

Ta tibaad marimit kamu asin makimi

Tinigsik ko an mga establishimento

Sa Peñaranda sinda nakapalibot nin todo

Mga makulay man asin makolor paghilingon

Lalu na an satong Kapitol

Alagad sa sakong paglaka-lakaw

An Simbahan sakong natanaw

Madiklumon asin kamunduan minakurahaw

Kaya sakong puso mina-aray asin natunaw

An pasko wara digdi sa parke

Ini mahihiling sa Simbahan purupirmi

Ta an kagtubos duman, naghahalat ini

Kaya dumanun taman an kagurangnan

Bisitahun asin rumdumun sa saiyang kaaldawan

Tinigsik ko man ining mga kaakian

Nagarabang sa mga tawo sa karangahan

Mahagad ki piso asin maski anu pa man

Pati kakaunon mo saindang pagtitripan

Alagad kun ika pubre man

Maglikay ka sa mga kaakian

Tatibaad sipa buda dura an saimong mamatean

Bago matapos an tigsik ko,

Igwa pa akong tigsik na itatao nin todo-todo

Ini manungod sa sarong tawo

Harani sa puso kan lambang bikolano

Tinigsik ko si Gov. Salseda

An saiyang presensya mamurawayun talaga

Siya simbolo nin marhay na pagranga

Asin sarong tawong matinabang sa kapwa

Sa saiyang Climate Change Academy

Ini karahayan sa gabos purupirmi

Kita lang ang igwa kaini

Kaya kitang mga Bikolano alagaan ini

Dai lang an hatod kan satong Gov. Salseda

Igwa pang kaogmahan na ngunian namamatean ta

Ini an karangahan na pigdudumanan ta

Lugar kun sain kaogmahan satong naeeksperyensya

Kaya labing pasasalamat satong ihatod sa saiya

Sa mga tabang na iniheras niya sa saiyang mga kahimanwa

Ai..ai..tibaad ako nasobrahan na

Sa pagbudal-budal nin tigsik ko na madrama

Kaya kita digdi na sana ta tibaad ako mabaldisan pa

Sayang man baga kan pagkagana

Sa sakong pagbudal-budal digdi sa hampangan

An sarong tigsik saindong namatean

Mga kuro-kuro asin katotoohan

Ini sarong parte nin satong buhay Bikolano man

Dios Mabalos sa Gabos Karangahan:Albay Green Christmas Satong ipadagos