TIGSIK(Bicol University Week 2011)

Magdangog2x
Dai magpara kiling-kiling,
Itikom ang ngabil sa sako maghiling…

Kun saindong narurumduman,
Ako man gilayun ini,
Nagtigsik sa hampangan nindo nun dati…
Nadaog sa daing aram na resulta..
Alagad uni minabwelta tanganing magpaogma,
Lingawan na ang medalya ta ako may ipapadangog na…

Sa giraray uni nanaman ako…
Sa hampangan nindu matigsik ki todo-todo
Tanganing ipasabot ang mga nahihiling ko…
Sa kapalibutan nagabos kita namumuro
sa pagpuon uni na ang banat ko…

Dios marhay na aldaw sa saindo mga tugang
Sa satong pag-irilingan tigsik an mamimidbidan
Sarong paghurop-hurop sa sakong naobserbaran
Alagad parte kaini an pagsabot sa katotoohan

Sa sakong paglakaw-lakaw digdi sa kinaban
Sa okasyon na ini ako nakaduman
Tanganing magtao nin kadiit na kaogmahan
Asin impormasyong saindong maaaraman...
Maduman kita na kita sa mga isyung bueňos...
Sa satong pag-iribanan dai matatapos...

Tinigsik ko an eskwelahan niato
Unibersidad nin Bikol an titulo
Dai ka magkamali na ika maloko-loko
Ta tibaad makahampangan mo an mga estudyanteng sa pag-adal an pamayo...
Kun todo mga formula, matematika, asin gabos na problema
Yan ang mga estudyanteng daing takot sa pinetensya...
Ta an aram ninda pagkatapos kaini an medalya mapapasainda...
Kun sa english ‘accomplishment’ kun baga...

Tinigsik ko man ining mga dagit...
Dagit kay Lady Guard na mandaragit...
Matang minaburarat sa mga pasaway na estudyanteng pigpipirit
Pigpipirit makalaog na dai nakaunipormeng matanos asin may kurit-kurit...
Alagad si Lady Guard tama man baga...
Matanos an pigagibo niya
Ini para man sa satong presensya
Presenyang matanos sa satong mga maestro’t maestra...

Tinigsik ko ining centree...
Gabos na tawo yaon digdi...
Tambayan kan mga estudyante
Udto man asin banggi
Alagad igwa akong nariparo
Satong centree makamundu
Tukawan bako-baku
Kaya an mga tawo madara ki sadiring bangku...
Igwa pa..2x
Centree ta maatiun bga
Magayon pa man mga burak niya
Alagad magduko ka...SUS maria!!!
Chichirya duman, plastic digdi...
Alagad ako namundu...
Sa pasador asin diaper ni NINI...
Sus man asikasuhun ta ini tanganing ining kahoy maging tunay na centree

Tinigsik ko ining bagong trangkahan..
Mahihiling ta duman sa hampangan..
Uto bagang puting gate duman..
Ai grey na gate palan...
Ulayunun man matapos ini...
Nakatapos na barang sina kuya asin ate...
Alagad ang fountain na pigasabi...
Ubas man giraray asin warang tubig na nakapirmi...
5 million an nawarang kwarta
Alagad marauton ang naging resulta...
Ulayun pa buksan para sa mga estudyante ta..
Alah udto baga naging U-turn na kan mga kotse asin vehikulo ta...alah3x

Tinigsik ko ining feild, oval, asin grandstand niato..
Grabeng pagbabago saimong maririparo...
Mga ilaw bagung-bago..
Isabay mo pa digdi ang pinturang bago,
Magayunun baga paghilingun
An oval asin feild na malinigun...
Bagong tabas an mga awot...
Kaya an mga estudyante grabe an pagkamuot...
Tambay duman...tukaw digdi
Kaya iresturyahan maugmahun purupirmi...
Alagad saimong bantayan
Kun magdiklum na an kinaban...
Mahihiling mo digdi SUS maria!!!
Bu...rak na minabuka mamamatean ta
An grabeng tukaan...kitikkan...asin kun anu pa man...
Iwasan ta ini mga tugang
Tanganing ining satong eskwelahan dai maging bar o “Balay Kaligayahan”

Tinigsik ko an BU week ta..
Maogma asin uragon talaga
Palaban an mga tugang ta
Tanganing makua an medalya
Alagad ini dai para sa paabaw-abawan
Uni para sa satong karahayan
Karahayang pisikal asin emosyonal man
Tanganing makaiwas sa problema asin sa kadipisilan
Kita gabos mag-ogma
Dai magparakurisong ta magurang ka
BU week baga kaya ngirit sana...

Tinigsik ko an mga freshmen ta
Fresh na fresh an parong ninda
Alagad igwa akong kadiit na bareta
Asin kadiit na sermon baga...
Sinda mga umboy pa
Alagad grabe na an pasale kan iba
Maurag kun maurag talaga
Level up pa sa mga ate asin kuya ninda
Grabe an pagtubod sa sadiri
Kaya dai aram kun tama an tigagibo purupirmi
Mga tugang kong freshmen
Dai na magpara-dabog2x pa
Ta yan an mga naririparo kan ibang tugang ta...
An samo sana ..
Magbagu na kita...

Tinigsik ko ining mga kantina ta,
Lalo na sina tiyo asin tiya na “walking canteen” an drama
Mga sinaput, banana cue asin kwek-kwek ninda
Sa mga estudyante masiramun talaga
Lalu na an empanadang kamote asin balingoy an bangot niya..

Tinigsik ko man ining si Morning Good
Sa mga kalokohan “he’s so good”
Kaogmahan kan mga tawo dai pigpupudpod
Kaya mga estudyante sa kamunduan dai nalulublub
Alagad an ibang tawo
Kalaban niya nin todo
Kaya tigparasupla an lolo mo
Kaya walk-out an drama ni morning good kuno
Kamu man pabayae sana daw nindu...

Bago kita magduretso..isabay ko man sa tigsik ko an romansa..
Tinigsik ko ining sakong namumutan
Itago ta na sana an pangaran
Siya sakong namumutang maray
Maski sa pagkamoot ko sa iya may kadiit na aray...
Alagad ini wara sana
Ta siya padaba ko talaga
An masasabi ko sa saiya
Ingat ka sana...
Uni man sana ako
Mapadaba sa saimo
Nin todo2x mwuah2x

Tara duretso na kita...

Maduman kita sa mga kolehiyo asin kampus kan unibersidad ta an CBEM, CSSP, CAL, IPESR, CS, CN, CE, CIT, CENG,BUPC,BU-GUBAT,BU-TABACO
Sinda mga matibay talaga...

Ai..ai..tibaad ako nasobrahan na
Sa pagbudal-budal nin tigsik ko na madrama
Kaya kita digdi na sana ta tibaad ako mabaldisan pa
Sayang man baga kan pagkagana
Bata nadaog na ngani kasu dating BU week ta...

Sa sakong pagbudal-budal digdi sa hampangan
An sarong tigsik saindong namatean
Mga kuro-kuro asin katotoohan
Ini sarong parte nin satong buhay estudyante man

Dios mabalos an BU Week satong ipadagos...

TIGSIK(BUCS Intramurals 2011)

Magdangog2x.
Dai mag para kiling-kiling
Itikom ang ngabil sa sako maghiling.

An sakong tigsik sa giraray pupunan.
Tanganing ang gabos dai bublayan.

Sa giraray uni nanaman ako
Sa hampangan nindu matigsik ki todo-todo
Tanganing ipasabot an mga nahihiling ko
Sa kapalibutan na gabos kita namumuro...
Sa pag puon uni na an banat ko...

Dios marhay na aldaw sa saindo mga tugang
Sa satong pag-irilingan tigsik an mamimidbidan
Sarong paghurop-hurop sa sakong naobserbaran
Alagad parte kaini an pagsabot sa katotoohan

Sa sakong paglakaw-lakaw digdi sa kinaban
Sa okasyon na ini ako nakaduman
Tanganing magtao nin kadiit na kaogmahan
Asin impormasyong saindong maaaraman...

Tinigsik ko ining satong kolehiyo
Kolehiyo nin Syensya an titulo
Dai ka magkamali na ika maloko-loko
Ta tibaad makahampangan mo an mga estudyanteng sa syensya an pamayo...
Kun todo mga formula, matematika, asin gabos na problema
Yan ang mga estudyanteng daing takot sa pinetensya...
Ta an aram ninda pagkatapos kaini an medalya mapapasainda...
Kun sa english ‘accomplishment’ kun baga...

Tinigsik ko man ining mga dagit...
Dagit kay Lady Guard na mandaragit...
Matang minaburarat sa mga pasaway na estudyanteng pigpipirit
Pigpipirit makalaog na dai naka unipormeng matanos asin may kurit-kurit...
Alagad si Lady Guard tama man baga...
Matanos an pigagibo niya
Ini para man sa satong presensya
Presenyang matanos sa satong mga maestro’t maestra...

Maduman kita sa mga kursong binabandera
Sa Kolehiyo nin Syensya mahihiling ta,
Apat mga kursong bidang-bida talaga,
Sa mga pasakit asin penitensya,
Alagad magayon man an magiging futuro ta,

Tinigsik ko uning mga taga-bio
Biology an hawak na kurso...
Sinda daing takot sa mga insekto...
Pati sa dugo asin laman kan tao...
Minatali sa mga unipormeng puti
Alagad minagayun asin minagwapo kun ini hinali...

Tinigsik ko man ining mga taga-chem
Sa chemistry sinda nakakim-kim...
Periodic table saindang minimaintain...
Sa mga formula sinda dai naduduling...
Mga matibay sa kemikal...
Asin minabida sa pag-adal...

Tinigsik ko man an mga Com-Sci
Computer Science an saindang tigpapay-pay...
Mga matibay sa equation asin logic na tighihimay-himay...
An mga problema sa sainda sisiw na nakalupaypay...
Mga Scientist sa pagdakula...
Asin an presensya daing mawawara...

Tinigsik ko man ining mga I.T
Information Technology an saindang tigpili
Sa matematika nosebleed purupirmi
Alagad daing takot sa pasakit na ini...
Mga matibay sa pag-program...
Alagad minabida sa computer languages na saindang aram...
Mga programmer asin propessional man...
Asin dai napapagal sa gabos na oras man...

Maduman kita sa sarong hot spot nin kolehiyo ni syensya...
An bagong student lounge na kakagibo pa sana...
Alagad igwa akong mga namateang istorya...
Asin iba-ibang problema..

Tinigsik ko an mga tukawan..
Sa kantinan na magayon sa mga tawong nasa bandang duman...
Ala torre ni david, torre ni martir ang drama
Kaya an mga liug minapiripit na sana...
Nyata man daw arug kaini ang nangyari magayon an plano..
Alagad sala an nagibo...
Tibaad loko-loko an trip nindu...

Maduman kita sa mga uso
Digdi sa kolehiyo nin syensya bagung-bago
Inutun ta sina apple,asus,toshiba,acer,sony vio,asin uning si lenovo
Digdi sa Csb2 sinda nagkatiripun nin todo..
Pindot duman pindot digdi..
Buksan si FB asin twitter purupirmi..
Yan an mga tiggigibo kan mga laptop na ini...
Ayos na ayos asin updated purupirmi..
Alagad an problema an internet connection na bongang-bonga..
Makusog pa an paturagoy asin ihi ni kuya...
Sa connection na tighahalat ta..
Kaya an sabi nin iba..”13 hours na drama sa internet ubos na sa sarong aldaw pa sana”
Basta man...

Alagad dumanun ta an B1...
An bagong establishimento satong naririparo duman...
Gabos na GA digdi mamamatean...
Arkilado sa gabos na acquaintance asin ibang kaogmahan...
An gabos nagpapasalamat ta ini nagibo..
Kaya an mga tagaCs sa paggamit kaini kabibo-bibo

Ay igwa pa akong nariparo
An pagkakandado kan b4 kun mudto
Kun maalas-dose na ika magiro-iro
Ta tibaad sa b4 sa selda an drama mo
Nyata man daw ini tigkakandaduhan..
Kaya an estudyanteng maklase digdi dumog kun mauran
Ta syempre ika man daw...wara sirungan
Pabor daw kamu sa sistema na nahihiling nindu ngunian...

Uni man sana an tigpapahiling nin kolehiyo nin syensya
Mga estudyanteng sobra an pag-adal asin minabida...
Sa mga kursong pinili ninda
Tanganing paghabot kan panahon...
Bakong gapo an makaon ninda...
Kundi futuro na makakatabang sa sainda...

Sa sakong pagbudal-budal digdi sa hampangan
An sarong tigsik saindong namatean
Mga kuro-kuro asin katotoohan
Ini sarong parte nin satong buhay estudyante man

Alagad kita digdi mapundo na
Ta tibaad aq mabaldisan pa
Sayang man baga an pagkagana
Sa BU week kita-kits na sana
Dios mabalos an okasyon na ini satong ipadagos...